Psa 101 | WSK | STEP | O Kari Biya, ni gemang nangarsam, ale munan diram te la nanga bitarsam, se mu ko ani ka wur ilu se ka nip patawirikko.

Psalms 101

King Devit balam nu diram la bagurukko mam

(Devit ko wur bo)

1 O Kari Biya, ni gemang nangarsam, ale munan diram te la nanga bitarsam,

se mu ko ani ka wur ilu se ka nip patawirikko.

2 Ani munan diram te la bagirikko.

Se ni amaru agate tairko ya?

Ani munan ningo diram la aga kawam te bitirikko,

3 se munan memek amatam te me aratukko.

Ani kari nubiring ni kisisan mu nunga betera kaora mu mesam,

nuna betesan turan ani me bitirikko,

4 kari kawel kuruwim mu arungu me dugu karikko,

ani kilek memek suen la abiring tuekko.

5 Kari awiriya saki alo nubiring ko den memek balso, mu ani kuring kalikko.

Se awiriya numi patowara supuling lagara mu te geragoso, mu ani yam amatam la me ariwirikko, ani karikkowo.

6 Ani kari nika kiring karo tusan mu la nunga kuerik ale

nunga balik se aninga kawam te agarak bagomonko.

Kari nunga bagara aolak diram mutang la aninga ura kari bagomonko.

7 Kawel kari bo ta aninga kawam te me bagomonko,

ale kawel kari bo ta aninga amakete me bagomonko.

8 Ani tom suen biya ali sor imi te kari memek alo nunga menawurikko,

ale nika wonong ningi kari memek suen la nunga karik se watingi aratomonko.